পৃষ্ঠা:গদা-পৰ্ব্ব.djvu/৩৩

(২৯)

নমস্কাৰ কৰি চৰণত,   কুৰু পাণ্ডৱৰ কথা যত,
  যুদ্ধৰ কাহিনি পুছিলো হো তাস্ক চায়॥
নাৰদে কহিলা কথা যত,  ভীষ্ম, দ্ৰোণ, কৰ্ণ, শৈল্য হত,
  ভুৰিশ্ৰবা, ভগদত্ত, জয়দ্ৰথ হত।
সেনা অষ্টাদশ অক্ষৌহিণী,  সবাকে মাৰিলা ৰণে জিনি,
  কুৰুনৃপতিৰ ভাই হত উন্নশত॥ ১৪৬ ॥
শোকে দুখে কুৰু নৃপবৰ,  গৈলা দ্বৈপায়ণ সৰোবৰ,
  নিন্দা বাণী তাঙ্ক বুলিলন্ত যুধিষ্ঠিৰ।
দুয্যোধন ৰাজা মহামানি,  সি কি সহিবেক নিন্দাবাণী,
  ঘোৰ গদা ধৰি সমৰ কৰিব বীৰ॥
গদাযুদ্ধে ভীম দুৰ্য্যোধন,  বেঢ়ি আছে ৰাজা প্ৰজাগণ,
  শিষ্যৰ সমৰ চাহিয়োক হলিৰাম।
নাৰদৰ বাক্য শিৰে ধৰি,  বিপ্ৰ সব নমস্কাৰ কৰি,
  আসিলোঁ শিষ্যৰ যুদ্ধ চাহিবাৰ কাম॥ ১৪৭ ॥
শুনি যুধিষ্ঠিৰ আদি ৰাজা,  পাঞ্চাল পাণ্ডৱ আদি প্ৰজা,
  বলোভদ্ৰ পাৱে প্ৰণাম কৰিলা বেঢ়ি।
যত আছে মহাৰথিগণ,  ভীমসেন ৰাজা দুৰ্য্যোধন,
  ৰামৰ চৰণে প্ৰণামিলা ৰণ এৰি॥
মহাৰথিগণে বোলে ৰাম,  কৈয়ো দুইহন্তৰ গুণগ্ৰাম,
  কোন কেন বীৰ কাৰ হৈবে ভঙ্গ জয়।
ৰামে বোলে দুয়ো একে সম,  শিক্ষাধিক একে পৰাক্ৰম,
  নিয়ম যুদ্ধত দুয়ো ভঙ্গ নুহি কয়॥ ১৪৮ ॥