এই পৃষ্ঠাটোৰ বৈধকৰণ হৈছে
৫৬
কুমৰ-হৰণ
পদ
এহিমতে খঙ্গি যেবে কুঁজী চলি যাই।
মধুমতী পটেশ্বৰী আছে যিবা ঠাই॥
আগবাঢ়ি কুঁজীয়ে যুড়িলা দুই হাত।
আই পটেশ্বৰী বুলি নমিলেক মাথ॥
ঊষাৰ লগত তুমি থৈলাহা আমাক।
একোকালে ঊষা নুশুনয় হাক ডাক॥
কহিৰ পুৰুষ গোট নিচিনি নাজানি।
স্বতন্ত্ৰ কৰিয়া ভিতৰক আছে আনি॥
এক শয্যা মাজে দুয়ো বসে মন ৰঙ্গে।
বাধিবে নোৱাৰি আমি ভৈলো বৰ খঙ্গে॥
মোহোৰ বচন নুশুনয় হাক ডাক।
বিস্তৰ বোলন্তে বোলে কাট এইৰ নাক॥
প্ৰত্যয় নযাসা যেবে চাহিয়োক যাই।
হেন জানি কৰিয়োক যেহেন যুৱাই॥
তোমাত জনাইলো মই জনাইবো ৰাজাক।
যেনে তেনে ৰাখো মই আপোনাৰ নাক॥
হেন শুনি পটেশ্বৰী কুঁজী হাতে ধৰি।
মাতন্ত ঊষাৰ অৰ্থে কাউ-বাউ কৰি॥
