এই পৃষ্ঠাটোৰ বৈধকৰণ হৈছে
মনৰ এৰাইল পীড়া আনন্দে ভৰিল।
তনু লোমাঞ্চিত নেত্ৰে লোতক ঝৰিল॥
প্ৰীতি প্ৰফুল্লিত মুখপদ্ম যত নাৰী।
গৃহৰ উপৰে চৰি হুয়া দুই শাৰী॥
ৰাম মাধৱৰ শিৰে পুষ্প বৰিষন্ত।
মুখ কমলক যেন নয়নে পিয়ন্ত॥
দধি দুৰ্ব্বাক্ষত উপায়ন পুষ্প গন্ধে।
পধূলি পধূলি দ্বিজে পূজিল প্ৰবন্ধে॥
অন্য অন্যে নাৰীগণে সম্বোধি কহয়।
কিনো তপ কৰিলে ব্ৰজৰ নাৰীচয়॥
দেখিয়ো আনন্দে যেন আছে মূৰ্ত্তি ধৰি।
হেন ৰাম মাধৱক দেখে নেত্ৰ ভৰি॥
গোপী সম ভাগ্যৱতী আউৰ কেৱ নাই।
কহে অন্য অন্যে সবে নাৰীগণে চাই॥
কৃষ্ণৰ কিঙ্কৰে কহে শুনা সৰ্ব্বজন।
বোলা হৰি হৰি আছে যাৱত চেতন॥
⸻⸻
