এই পৃষ্ঠাটোৰ বৈধকৰণ হৈছে
৭৯
উদ্যোগ পৰ্ব্ব
কন্যাগণ দিলে যত বিবিধ সম্ভাৰ।
দূতৰ শুনিছা কৈত হেন ব্যবহাৰ॥
দূতৰ বিহিত যত শাস্ত্ৰ ধৰ্ম্ম নয়।
নগৰৰ বাহিৰত থাকো মই যাই॥৩৪৫
কপটিত কপট কৰিলা দেৱ হৰি।
উঠি গৈলা পাছে বিদুৰৰ হাতে ধৰি॥
বৈশম্পায়ন বদতি শুনিয়ো নৰেশ্বৰ।
বিদুৰৰ গৃহত ৰহিলা দামোদৰ॥৩৪৬
যত দুঃখ কৌৰবে দিলেক বিপৰিত।
সুমৰি নিশ্বাস তেজে বিদুৰে সহিত॥
মহা দুঃখে খেদমনে ভকতক স্মৰি।
কুন্তীৰ গৃহত গৈয়া প্ৰবেশিলা হৰি॥৩৪৭
দেখন্ত শোকত কুন্তী বিকল স্বভাৱ।
জানু শিৰে নমিলন্ত কৃষ্ণে দুই পাৱ॥
কুন্তীৰো পৰম প্ৰেম মাধৱক পাই।
গলে বান্ধি কান্দন্ত লোতক বহি যাই॥৩৪৮
বাৰ্ত্তা পুছিলন্ত পাছে মাধৱৰ আগে।
মহাস্নেহে গোসানী পুত্ৰক অনুৰাগে॥
অন্যো অন্যে স্নেহে যেন সবে এক কায়া।
কাকো কেৱে নেৰে যেন দৰ্পণৰ ছায়া॥৩৪৯
