এই পৃষ্ঠাটোৰ বৈধকৰণ হৈছে
৭০
উদ্যোগপর্ব্ব।
দুই দণ্ডৰ পথ নিয়া আগবঢ়াই থৈলা।
হৰি ধ্বনি কৰি পাচে সেহি থানে ৰৈলা॥ ৩১৩
আত অনন্তৰে কথা শুনা অনুপাম।
ব্ৰহ্মাৰ মানস পুত্ৰ সপ্ত ঋষি নাম॥
গোবিন্দ চলিলা দেখি মহাবেগে খেদি।
আসিলন্ত স্বৰ্গ ভূবনৰ পথ ভেদি॥৩১৪
গোবিন্দৰ ৰথ বেগ দেখি গুণি মনে।
আগ ভেন্টি ৰহিলেক সপ্ত ঋষি গণে॥
কৃষ্ণেয়ো দেখিলা দুই পাশে বিপ্ৰগণ।
ৰথ হন্তে নামি গই নমিলা চৰণ॥৩১৫
মাধবে বোলন্ত গুৰু মোৰ বৰ ভাগ।
ব্ৰহ্মাপুত্ৰ ঋষি মনুষ্যে পাইলো লাগ॥
সপ্তঋষি বদতি মাগিবো এক দান।
তিনিয়ো ভূবনে যাৰ সম নাহি আন॥৩১৬
নুখুজিবো অন্যত্ৰ লোকত যাক পাই।
কাল বেগে নষ্ট হোৱে তাতো শ্ৰদ্ধা নাই॥
যাক পাইলে ব্ৰহ্মাৰো পদত নাই ৰতি।
আমাক দিয়োক প্ৰভূ সে প্ৰেম ভকতি॥ ৩১৭
চৰণৰ ধুলি দিয়ো ব্ৰহ্মাৰ বাঞ্চিত।
আৰু এক গোচৰ শুনিয়ো মনোনীত॥
