এই পৃষ্ঠাটোৰ মুদ্ৰণ সংশোধন কৰা হৈছে
অসমীয়া ৰামায়ণ।
প্ৰণামিয়া ৰামে তান্তে পুছিলন্ত কাজ।
কৈৰ নৃত্য গীত শুনি সৰোবৰ মাজ॥
ৰামক অৰ্চ্চিয়া মুনি আনন্দিত মনে।
যথাবৃত কথা কহিলন্ত তেতিক্ষণে॥
শুনিয়োক নৰনাৰী এক মন কৰি।
ৰামৰ চৰণ চিন্তিয়োক হৃদিধৰি॥
ৰাম সম দেব নাহি ভকত বৎসল।
ভজিল মাত্ৰকে সবে সাধিন্ত কুশল॥
বিৰাধে কৰিলা দ্ৰোহ সীতাক হৰিলা।
ভজিল মাত্ৰকে প্ৰভু তাহাক তাৰিলা।
আপুনি দহিলা সিটো পাপীৰ শৰীৰ।
হেন কৃপালুক নভজয় কোন বীৰ॥
ধন জন মদে আকে বিষয় জঞ্জালে।
নভজে ৰামৰ দুই চৰণ কমলে॥
হেনজানি ধনজন গৰ্ব্ব পৰিহৰি।
ৰমিয়ো পৰম ৰাম ৰূপ হৃদি ধৰি॥
সাক্ষাতে অমৃত শুনা ৰামৰ চৰিত্ৰ।
বোলা ৰাম ৰাম হৌক জগত পবিত্ৰ॥
