পৃষ্ঠা:অসমৰ বুৰঞ্জী গোহাঞি বৰুৱা.djvu/৭

ৱিকিউৎসৰ পৰা
Jump to navigation Jump to search
এই পৃষ্ঠাটোৰ বৈধকৰণ কৰা হৈছে


সচিবৰ ভূমিকা


 ১৯৫৮ চনতে প্রতিষ্ঠাপিত অসমৰ জাতীয় অনুষ্ঠান অসম প্ৰকাশন পৰিষদে অসমৰ ভাষা-সাহিত্য-সংস্কৃতিলৈ অনেক মূল্যবান অৱদান আগবঢ়াইছে।পৰিষদে আর্থিক লাভালাভলৈ আওকাণ কৰি আমাৰ ভাষা-সাহিত্য-সংস্কৃতিৰ শ্রেষ্ঠ সাহিত্যিকসকলৰ ৰচনাৰাজি একত্রে সঙ্কলন—যথা, গােহাঞিবৰুৱা ৰচনাৱলী, জ্যোতিপ্ৰসাদ ৰচনাৱলী, ফণী শৰ্মা ৰচনাৱলী, বাণীকান্ত ৰচনাৱলী,অম্বিকাগিৰী ৰায়চৌধুৰী ৰচনাৱলী, ৰত্নেশ্বৰ মহন্ত ৰচনাৱলী, লম্বােদৰ বৰা ৰচনাৱলী, ভােলানাথ দাস ৰচনাৱলী আদিৰ উপৰিও সাহিত্যিক-ৰাজনীতিক গােপীনাথ বৰদলৈ,তৰুণৰাম ফুকন,নবীনচন্দ্ৰ বৰদলৈ আদিসকলৰ সমগ্ৰ ৰচনা প্ৰকাশ কৰি অসমীয়া বুদ্ধিসত্তা আৰু বৌদ্ধিক জগতত এক আলােড়ন সৃষ্টি কৰিছে। ঠিক একেদৰে বিশ্ববিশ্রুত মহাত্মা গান্ধী, জৱহৰলাল নেহৰু, ড°সর্বপল্লী ৰাধাকৃষ্ণণ,ৰাস্কিন,ৰাছেল,ৰবীন্দ্রনাথ আদিৰ লেখীয়া মনীষীসকলৰ চিন্তা-ভাবনা প্ৰকাশক গ্রন্থৰ প্ৰকাশৰদ্বাৰা অসমীয়া পাঠকৰ মানসিক দিগন্ত বিস্তৃত-বিধৌত কৰাত সহায় কৰিছে।অসমৰ প্ৰাচীন বুৰঞ্জী অধ্যয়নৰ দিশত অসম প্ৰকাশন পৰিষদ এক বলিষ্ঠ ভূমিকাত অৱতীৰ্ণ হৈছে। ড°মহেশ্বৰ নেওগৰ প্ৰাচ্য-শাসনাৱলী,ড°ডিম্বেশ্বৰ শৰ্মাৰ কামৰূপ-শাসনাৱলী, হিতেশ্বৰ বৰবৰুৱাৰ আহােমৰ দিন, গুণাভিৰাম বৰুৱাৰ আসাম বুৰঞ্জী,পদ্মনাথ গােহাঞিবৰুৱাৰ অসমৰ বুৰঞ্জী, ড° হেম্বকান্ত বৰপূজাৰীৰ দ্য কম্প্রিহেনচিভ হিষ্ট্রি অব আচামকে ধৰি বুৰঞ্জী বিষয়ক গ্রন্থ প্রকাশ কৰি পৰিষদে বুৰঞ্জী ৰচনাৰ ধাৰাবাহিকতা অটুট ৰাখিছে।এই দিশত এক বলিষ্ঠ সংযােজন হ’ল অসমৰ প্রথম আলােচনী অৰুনােদই, আসাম বন্ধু আৰু মৌৰ একত্র সঙ্কলন।

 বৈষ্ণৱ যুগৰ অৱদান বিষয়ক গ্রন্থ—সত্ৰীয়া নৃত্য আৰু সত্ৰীয়া নৃত্যৰ তাল, সত্ৰ-সঙ্গীতৰ স্বৰৰেখা, কীর্তন-ঘােষা আৰু নাম-ঘােষা; প্রাচ্য-পাশ্চাত্যৰ ৰামায়ণ, মহাভাৰত, ইলিয়াদ, ওডিছী আৰু ইনীদৰ দৰে ধ্রুপদী মহাকাব্যৰ প্রকাশনক আমাৰ পাঠক সমাজে সাদৰেৰে আকোৱালি লৈছে।

 ভাৰতীয় পৰম্পৰাৰ পঞ্চতন্ত্র, হিতােপদেশ,কথাসৰিৎসাগৰ;বিশ্ব-সাহিত্যৰ অজান দেশত এলিচ আদি একসংখ্যক প্রখ্যাত শিশু-গ্ৰন্থ আৰু জনপ্রিয় বিজ্ঞান বিষয়ক পুথিৰে অসম প্ৰকাশন পৰিষদে ভাষা-সাহিত্যৰ প্ৰচাৰ-প্ৰসাৰত সততে অৰিহণা যােগাই আহিছে।

 কিন্তু অসম প্ৰকাশন পৰিষদৰ দৰে জাতীয় অনুষ্ঠান এটাৰ পৰাই ইতিমধ্যে প্রচলিত অনেক দুর্মূল্য আৰু দুষ্প্রাপ্য গ্রন্থ বছৰ বছৰ ধৰি প্ৰকাশ নােহােৱাকৈ থকাত গ্রন্থ আগ্ৰহী সমাজ গ্রন্থ-অধ্যয়নৰ পৰা বিৰত থাকিব লগাত পৰিছে।সেয়েহে আমি এই ২০০৩ বর্ষতে প্রায় ছকুৰি গ্ৰন্থ পুনঃ মুদ্রণ কৰি পাঠকসমাজলৈ আগবঢ়ালাে। আশা কৰিছো, পঢ়ুৱৈ সমাজে প্রকাশন পৰিষদৰ গ্ৰহ পূর্ববৎ আগ্ৰহেৰে আদৰি ল'ব।


গুৱাহাটী        লক্ষ্মীনাথ তামুলী আই.এ.এছ

আগষ্ট ২০০৪         সচিব

          অসম প্ৰকাশন পৰিষদ