এই পৃষ্ঠাটোৰ বৈধকৰণ হৈছে
কোট
কোঠাৰ একাষে বেৰৰ দাঁতিত
দৰক লাগি ৰৈ আছে আলনাডাল
বহু পুৰণি
দুপৰৰ নিৰুদ্বেগ ঘৰৰ ছালত বহি থকা
কপৌ এজনীৰ দৰে যেনিতেনি বহি আছে
চোলা, পেন্ট আদি পৰিধেয় পোচাকবোৰ
সিহঁতৰ দুচকুত মদৰুৱা সপোনৰ সাঁচ।
আলনাৰ এমূৰে মূৰ দাঙি বহি আছে এটা কোট
দেউতাৰ,
মলিয়ন ৰং, কলাৰ ফিচিকা
জেপৰ ফুটাৰে মুদ্ৰাবোৰে কৰে অহাযোৱা
চিনাকি বাট হেৰুৱাই
কেতিয়াবা যুঁজ লাগে ইটোৰে সিটোৰ।
চেকেণ্ড হেণ্ড পোচাক বিক্ৰী কৰা বজাৰৰ পৰা
ময়ে কিনিছিলো সেইটো
কোনোবা গাঠলু মানুহৰ আছিল কোটটো
টিলিকা গাৰ দেউতাৰ জোখত
সৰুকৈ সী দিছিল
লেঙেৰা কলীমন দৰ্জিয়ে।
মই আলনাডাল থকা কোঠাটোত সোমালে
কোটটোৰ ফিচিকা চিলাইবোৰে হাঁহে
অৱশিষ্ট বুটাম কেইটাই মালিতা জোৰে অনৰ্গল
ওলমি থকা বুকুৰ জেপটোৱে কথা পাতে
মোৰ সৈতে।
৩৪ / অনুচ্চ আৰ্তি
