এই পৃষ্ঠাটোৰ বৈধকৰণ হৈছে
অনন্যা
আমি সলনা-সলনি কৰোঁ আহা
ইজনে সিজনক
নাৰীয়ে পুৰুষক
পলসে পথাৰক
তুমি দিয়া মোক
বক্ষৰ পৰা শ্ৰোণীলৈকে
বাহিৰে-ভিতৰে সকলো
পাখি সজাঁলাৰ পৰা
উৰ্বৰতাৰ সীমালৈকে সকলো উজাৰি
সোণোৱালী সাপ
আৰু
সেউজীয়া বেলপাতে একেলগে
পিন্ধক সেন্দূৰৰ বোল।
আঃ!
কিযে আনন্দময় যন্ত্ৰণা তোমাৰ!
আঘোণৰ জোনাক ৰাতি জৰায়ুত ফুলে
সোণবৰণীয়া সৰিয়হ ফুল।
মইনো দিম কি তোমাক
এটি ফিৰিঙতি মাথোঁ
ধিকি ধিকি তাৰো প্ৰাণ
আধৰুৱা মোৰ গান
নিপিন্ধালৈকে তোমাৰ স্বৰলিপিৰ অহঙ্কাৰ।
তোমাৰ হিৰন্ময় কুম্ভৰ
অপাৰ কুম্ভকেৰে নোওঁৱা মোক
অন্ত হওক প্ৰতীক্ষাৰ অধিবাস
মলঙা সময়ে নখৰ পৰা চুলিলৈকে সানক
গুটিমালিৰ মলমলীয়া
সুবাস।
অনুচ্চ আর্তি/ ৩৩
