এই পৃষ্ঠাটোৰ বৈধকৰণ হৈছে
ৰাতিপুৱাৰ এ’লিজি
পুৱা বাতৰি কাকতৰ পৃষ্ঠাত বিচাৰি ফুৰোঁ মই
পথাৰৰ মাজত নহ'লেবা নৈৰ দাঁতিত অথবা
জাহুকানিৰ মাজত কিম্বা জলাহৰ কাষত
উদ্ধাৰ হোৱা মৃতদেহৰ খবৰ।
সতেজ অথবা উৱলি যোৱা মৃতদেহ
মুণ্ডহীন মৃতদেহ
গুলিবিদ্ধ মৃতদেহ
হাতদুখন পিছলৈ বান্ধিথোৱা
আঁঠুৰ ঘিলা কঢ়া
চকুৰ মাণিক ঘুকটি উলিওৱা
যৌনাঙ্গ খণ্ডিত কৰা মৃতদেহ।
ৰুৰুৱাই জ্বলি থকা নেদেখা জুয়ে
ছাৰখাৰ কৰে বুকুৰ পথাৰ
দিনৰ ৰ'দ শুহি খাই তেজপিয়াই
ভৰ দুপৰীয়া বিশাল ডেউকা মেলি
ছোঁ মাৰি নামি আহে আন্ধাৰৰ
কালপক্ষী।
মোৰ ভাইটোক কিছুদিনৰ আগতে
মাজনিশা
শোৱাপাটিৰ পৰাই পঘাৰে বান্ধি
চোঁচৰাই লৈ গ'ল কোনোবাই
সি আজিও উভতি অহা নাই।
৩০ / অনুচ্চ আৰ্তি
