নিয়ৰ

ৱিকিউৎসৰ পৰা
Jump to navigation Jump to search
নিয়ৰ
লেখক চন্দ্ৰকুমাৰ আগৰৱালা

মুকুতা মণিটি পাহিত জিলিকে

ফটিক পানীত ধোৱা

নিশাৰ তৰা এটি সৰিয়েহে আছে

সৰগত টোপনি যোৱা
 


নিজম আকাশৰ নিচুক কথাটি

হিয়াত থৈছে সাঁচি

কোন কাহানিৰ সপোন দেখিছে

কোনে হাঁহিছিল নাচি
 


ফুলনিত কোনে নিশা নাচিছিল

ছিগি ৰই গ’ল মণি

ৰঙিলীৰ ভাব হাঁহি নাচোনৰ

ৰ’ল চিন এইকণি
 


ৰাতিৰ ধেমালি জোনৰ নিফুট

হাঁহিৰে থৈছে সানি

পুৱাৰ হেঙুলি বেলিটিলৈ চাই

এটুপি চকুৰ পানী
 


নিয়ৰ কলিৰে শোভে ফুলজুপি

চাইছো ভাবতে ভাহি

হায় কি বিষম পেলালে বায়ুৱে

জোকাৰি ফুলৰ পাহি