চিৰসুন্দৰে ধৰিব খুজিছে

by জ্যোতিপ্ৰসাদ আগৰৱালা

চিৰসুন্দৰে ধৰিব খুজিছে
            বিশ্বজনতা ৰূপ৷
নবীন গন্ধে নবীন বৰ্ণে
            জনজীৱনৰ মন্ত্ৰ জাগিছে
                        তন্ত্ৰ জাগিছে
            আকাশে আকাশে বিয়পি পৰিছে
                        নৱজীৱনৰ ধূপ৷

আজি জনতাৰ জোনাকী চকুত
            স্বৰ্ণজ্যোতি জ্বলে
আজি জনতাৰ মন ফুলনি
            সুশোভিত ফুলে ফলে

আজি জনতাই
            পৰাশ পালে
            হৰষ পালে,
নৱকিৰণৰ গান গালে৷
মনেৰে প্ৰাণেৰে চিনি স্বৰূপ
নতুন পৃথিৱী গঢ়িবলে’ আজি
            ধৰিছে শিল্পীৰূপ৷৷