আমাৰ গাঁও

ৱিকিউৎসৰ পৰা
Jump to navigation Jump to search
আমাৰ গাঁও
লেখক আনন্দ চন্দ্ৰ আগৰৱালা

শুৱনি আমাৰ গাঁওখন অতি,

শুৱনি গছেৰে ভৰা;

ডাল ভৰি ভৰি ফল ফুল লাগে,

কত পাওঁ তল সৰা।

শুৱনি আমাৰ ধাননি পথাৰ

ধানেৰে উপচি পৰে;

শুৱনি নদীৰ পানী ভৰা ঘাট,

মুদৈয়ে বেপাৰ কৰে।

চালত কোমোৰা, লাও, জিকা, ভোল,

ভঁৰালত জহা ধান;

গোহালিত গৰু পুখুৰীত মাছ,

বাৰীত তামোল পাণ।

গছৰ ডালত শুৱনি চৰায়ে,

শুৱনি সংগীত গায়;

শাকনিত শাক, ফুলনিত ফুল,

দেখিলে হিয়া জুৰায়।

ঘৰে ঘৰে ৰং ধেমালিৰ হাট

ঘৰে ঘৰে হাঁহি মুখ;

ঘৰে ঘৰে ভাল চেনেহা-চেনেহী,

ঘৰে ঘৰে দেখো সুখ।

ভাওনা সবাহ গীত ভাল পোৱা,

মধুৰ মুৰুলী তান;

দহোটাৰ কাম একেজনে কৰা

চহাৰ সৰল প্ৰাণ।