মণিৰাম দেৱানৰ গীত
 | এই পাঠ্যৰ উৎস গ্ৰন্থ বা নথি অজ্ঞাত। প্ৰামাণ্যতাৰ সবিশেষ জানিবলৈ অনুগ্ৰহ কৰি এই পাঠ্যৰ আলোচনা পৃষ্ঠা চাওক। "উৎস"ৰ অৰ্থ এই কামৰ প্ৰতিলিপি আনে বিচাৰি পাব পৰা স্থান। সাধাৰণতে ই ৱিকিমিডিয়া কমন্সত আপল'ড কৰা আৰু মুদ্ৰণ সংশোধন কৰিব পৰা মূল কামৰ স্কেন ফাইল। যদি নাই, তেন্তে এটা URL হ'লেও দিয়া উচিত; একো নাথাকিলে অনুগ্ৰহ কৰি আলোচনা পৃষ্ঠাত কাৰণ উল্লেখ কৰিব। |
- ১
- আই সৰেচতী দেৱী পাৰেৱতী
- তোমালৈ বঢ়াই যাওঁ চাউল,
- পাহৰা পদকে সোঁৱৰাই দি যাবা
- গীতৰ ভাঙি যাবা আউল।
- ২
- চান্দক সেৱা কৰোঁ সূৰ্যক সেৱা কৰোঁ
- পাৰ্ৱতীক সেৱা কৰো,
- ভৰলী আইকো কৰোঁ সাত সেৱা
- মণিৰামৰ ভণিতা জোৰোঁ।
- ৩
- কোনে বোলে জীলে,
- ইংৰাজে দেশখন
- আকৌ আমাক দিলে
- ৪
- কোনো বোলে চৰিল,
- ইস্কট চাহাবেৰে সখি কৰিলে।
- চাহাবে কলেহি বুজাই,
- অসম দেশ লব লাগে
- বৰ লুইতে উজাই।
- ৫
- নহ'বলৈ হ'ল
- অসম দেশ গুচি
- বঙাল দেশ হ'ল।
- নহ'বলৈ হ'ল
- ইংৰাজ উঠা দেখি
- ৰাইজৰ মন ভাল হ'ল।
- ৬
- মনে গুণি চালে-
- মণিৰাম দেৱানক মন্ত্ৰী বাব দিলে
- অনেক গুণনি ধৰিলে দেৱানদেৱৰ
- ভাটীলৈ ভটিয়াই গ'ল।
- বঙালৰ ঘৰতে আপালি মিলিল ঐ
- দেশখন তল-ওপৰ হ'ল।
- ৭
- ৰূপৰ তোলোথা সোণৰ দোৰ্পতি
- বহি বৈ আছিলো তাঁত,
- লাহে-লাহে কৰি মণিৰাম দেৱানে
- লগায় পটেশ্বৰীক মাত।
- ৮
- পানী আন ব'মৰ মাক
- ভাত আন ব'মৰ মাক,
- মই যাওঁ বঙাল দেশলৈ।
- ৯
- গাটি মোৰ ৰঙে চং
- খোপাতে মোৰ বালি চং
- চ'ৰাতে নো মূৰে যুঁজায়
- কলৈ নো মোৰ স্বামী যায়।
- ১০
- কান্দিবলৈ ধৰিলে তুলাৱতী গাভৰু
- মণিৰামৰ মুখলৈ চাই
- গাৰ মঙ্গহ লৰে, সোঁ চকু লৰিছে
- কাউৰীজনীয়ে খায়।
- ১১
- এ- দেউ ৰ'ল
- চ'ৰা মাৰি দেৱানদেৱ
- ভটিয়াই গ'ল।
- নগৰৰ হ'ল বাজ
- পোনাই গৈ পালেগৈ
- চিলমাৰী ৰাজ।
- এ- দেউ
- কিনো মাছ মাৰিবৰ শল।
- চিলমাৰীতে দেৱানৰ
- আদ বছৰ গ'ল।
- ১২
- মিৰিটি কান্দিলে কান্দে মিৰিয়নী
- লুইতৰ বালিলৈ চাই,
- মণিৰাম দেৱানে কান্দে কলিকতাত
- ৰংপুৰ জিলালৈ চাই।
- ১৩
- বৰা ধানৰে নৰা মোৰ দেউতা
- বৰা ধানৰে নৰা,
- মণিৰাম দেৱানৰ অমঙ্গল মিলিল ঐ
- ওলাল নেজলগা তৰা।
- ১৪
- এদিন দুদিনকৈ দিনে চাৰি গ'ল
- আমঠু পৰি গ'ল ক'লা,
- যঁতৰত সূতা কাটে বিনন্দিনী গাভৰু
- যঁতৰত নুঘূৰে শলা।
- ১৫
- ৰৈ নো ৰৈ কান্দিলে বৃন্দাৱনী গাভৰু
- তামৰ ঘৰৰ মুখলৈ চাই
- তামৰ ঘৰ আছে দেও, স্বামী নাইকীয়া
- কোনে নিলে মণিৰামক পাই।
- ১৬
- চম্পাৱতী গাভৰুৰ সেন্দুৰ মচে খালে
- ঘনে সোঁহাত লৰে,
- কাউৰীয়ে ৰমলিয়ায় ফেঁচাই কুৰুলিয়ায়
- সপোনত আগদাঁত সৰে।
- ১৭
- দেশ পাতিবলৈ ওলালি মণিৰাম
- জঁতৰাই মাৰিলে হাঁচি
- লগৰ সমনীয়াই শতৰু শালিলে
- ললি যোৰহাটত ফাঁচী।
- ১৮
- ৰজা পাতিবলৈ ওলালি মণিৰাম
- জঁতৰাই মাৰিলে হাঁচি,
- ল'ৰাকৈ তিৰুতা এথানিত পেলালি
- ললি যোৰহাটত ফাঁচী।
- ১৯
- মণিৰাম গৈছিলে বঙালৰ দেশলৈ
- ৰংপুৰত মাৰিলে হাঁচি,
- কাণৰ গুণা ছিগি অমঙ্গল মিলিল ঐ
- দিলে যোৰহাটত ফাঁচী।
- ২০
- চিৰিপ্ চিৰিপ্ কৰি
- চাহাব গৈ আছিলে
- মণিৰাম গৈছিল নাৱত,
- মণিৰাম দেৱানে টাংগুটি খেড়োতে
- পিছলি পৰিল খালত।
- ২১
- এপিনে পাৰ হল মৰিকৈ মিছিমি
- এপিনে পাৰ হ'ল ডোম,
- এপিনে পাৰে হ'ল মণিৰাম দেৱান ঐ
- পিছলি পৰিলে খালত।
- ২২
- ভটীয়াই গলেগৈ উজনীৰ মণিৰাম
- বাটত খাই গ'ল জৰা,
- মণিৰামৰ বাটৰি নেপাওঁ ভালে কৰি
- যংতৰৰ নুঘুৰে শলা।
- ২৩
- মণিৰাম দেৱানে 'ভাট' ফকিৰক
- চিঠি দি পঠিয়াই দিলে,
- দিচৈ নৈৰ পাৰতে পৰ্বতীয়া বৰুৱাই
- ফকিৰক ধৰোৱাই দিলে।
- ২৪
- তৰাণিৰ মাজৰে গান্ধী ঐ মণিৰাম
- তৰাণিৰ মাজৰে গান্ধী,
- যেতিয়াই পালেগৈ হাওলাট চাহাব
- তেতিয়াই আনিলে বান্ধি।
- ২৫
- হাবিৰ ডলীয়া বেত মোৰ দেউতা
- হাবিৰ ডলীয়া বেত,
- মণিৰাম দেৱানক বান্ধি-ছাটি লৈছে
- গোৰোহাই বৈ যায় তেজ।
- ২৬
- উজায়ে আহিলে মণিৰাম দেৱান ঐ
- বাটত কিনি খালে আখৈ,
- খৰকৈ যোৱাগৈ ব'মৰ মাকক কোৱাগৈ
- মূৰতো নিদিব কাকৈ।
- ২৭
- ৰূপৰ ধোঁৱাখোৱাত খালি ঐ মণিৰাম
- সোণৰ ধোঁৱাখোৱাত খালি,
- ৰজা হবলৈ ওলালি মণিৰাম
- ডিঙিত ছিপেজৰী ললি।
- ২৮
- আজি কি বাৰ গুৰু বৃহপতি
- কালি কি বাৰ শুকুৰ,
- মণিৰাম দেৱানৰ অমঙ্গল মিলিত ঐ
- চালতে বগালে কুকুৰ।
- ২৯
- উজায়ে আহিলে কাকতি-ফৰিঙে
- বৰতী (ব্ৰডী) চাহাবৰ দিনত,
- মাহে সৰিয়হ চপাই খাই গ'ল
- পকা ধান নেখালে ঘিণত।
- ৩০
- উজায়ে আহিলে মণিৰাম দেৱানঐ
- মাজুলীত চটালে চটি,
- ৰংপুৰ জিলাৰে বৰশী আনিলে
- ডিঙিত চিপে জৰী দিলি।
- ৩১
- ছ অৰা নাও লৈ লালেবন্দী দিবলৈ
- মণিৰাম ভটিয়াই গ'ল,
- পাচতে থাকিলে পিয়ালী বৰুৱা
- ছকুৰি পাইকৰ খেল।
- ৩২
- যোৰহাটত নুৰুবি আদা মোৰ কুটুম ঐ
- গোলাঘাটত নুৰুবি আদা,
- সাটোটা গেৰাজৰ চিপাহী
- দিলে মণিৰামক খেদা।
- ৩৩
- মণিৰামৰ বৰে ঘৰ কুঠলি কুঠলি
- চুঁচৰি সোমালে গুঁই,
- মণিৰাম গৈছিলে দেশ মাৰিবলৈ
- বন্দুকে নিদিলে জুই।
- ৩৪
- টেকেলি পৰিবৰ নাদত হৰি হৰি
- টেকেলি পৰিবৰ নাদত,
- বাগী দি সাৰিলে চৰাৰ চাৰি ফুকন
- মণিৰাম পৰিলে ফান্দত।
- ৩৫
- চান্দো লৰিছে সুৰুযো লৰিছে
- লৰিল বসুমতী আই,
- বাৰ পাল ৰণুৱাই খেদিব লাগিছে
- মণিৰামৰ কিনো বিলাই।
- ৩৬
- চোঁতালৰ আগৰে কাঞ্চন ফুল এপাহি
- নিতৌ একো পাহি সৰে,
- মণিৰাম দেৱানক চাঙলৈ তুলিলে
- আগতকৈ জেউতি চৰে।
- ৩৭
- জিলীয়ে কৰিবৰ কা মোৰ দেউতা
- কাউৰীয়ে কৰিবৰ কা,
- তিনি আলি মূৰতে মণিৰামক মাৰিলে
- উভতি বলিলে বা।
- ৩৮
- ফেঁচুৱে কৰিলে চিঁউ মোৰ দেউতা
- ফেঁচুৱে কৰিলে চিঁউ,
- মণিৰাম দেৱানক ফাঁচী দি মাৰিলে
- আকাশে উৰি গ'ল জিউ।
- ৩৯
- মণিৰামক মাৰিলে আঁৰ কাপোৰ তৰিলে
- ওপৰে বগালে চিলা,
- মণিৰামৰ কাম-কাজ কৰিব লাগিলে
- পামগৈ শদিয়া জিলা।
- ৪০
- আগনিশা কান্দিলে ঘুঘূঁৰী কপৌ
- পাচনিশা কান্দিলে ফেঁচা,
- মণিৰাম দেৱানক যোৰহাটত মাৰিলে
- চেঁচা হ'ল ৰংপুৰ জিলা।
- ৪১
- মণিৰামক মাৰিলি ভালকে কৰিলি
- পিয়ালিক মাৰিলি কিয়,
- সেইনো কথা শুনি ৰংপুৰৰ আমোলাৰ
- আকাশে উৰি গ'ল জীৱ।
- ৪২
- ৰৈ ৰৈ কান্দিলে চুঙাৰ বাদুলী
- ৰৈ ৰৈ কান্দিলে জিলী,
- ৰৈ ৰৈ কান্দিলে লগৰ সমনীয়াই
- মণিৰামক মাৰিলে বুলি।
- ৪৩
- ভীৰ খাই বগৰি লাগিল,
- মণিৰাম দেৱান মৰিবৰে পৰা
- টেক্সি খাজনা লাগিল।
- ৪৪
- কান্দিবলৈ ধৰিলে গাঁওৰ বুঢ়া-মেথাই
- দেৱানৰ কথালৈ চাই,
- সাতৰাজ মাৰি একেৰাজ কৰিলে
- ললে যোৰহাটত ঠাই।
- ৪৫
- ভাৱনাত লগালে ম'তা মণিৰাম
- ভাৱনাত লগালে মতা,
- নগাঁও নৰঙ্গী শবদ ফুটি গল
- অকল মণিৰামৰ কথা।
- ৪৬
- লথৌৱে লঠালে পুৰন্দৰে পুৰিলে
- হৰনাথে মাৰিলে কণ,
- অতক ধনেকৈ নাটিলে মণিৰাম
- ভাটীলৈ মেলিলি মন।
- ৪৭
- চালত মলঙিলে চালেদৈ কোমোৰা
- টেকেলিত মলঙিলে লোণ,
- মাটিত মলঙিলে মণিৰাম দেৱান ঐ
- নেকান্দি থাকিব কোন।
- ৪৮
- বালিত জিলিকিলে বালিৰ বালিচন্দা
- তাতোকৈ জিলিকে সোণ,
- তাতোকৈ জিলিকে মণিৰাম দেৱান ঐ
- নেকান্দি থাকিব কোন।
- ৪৯
- অতিকৈ চেনেহৰ মুগাৰ মহুৰা
- তাতোকৈ চিকুণ মাকো,
- তাতোকৈ চিকুণ মণিৰাম দেৱান ঐ
- নেকান্দি কেনেকৈ থাকো।
- ৫০
- ৰজাৰ নাওখন কোৰোকাকুৰুকি
- ললে ৰৌমাছে কোৰ,
- মণিৰাম দেৱানৰ ফাঁচী হবৰে পৰা
- চকুলো নুগুছে মোৰ।
- ৫১
- ই বোলে মণিৰাম, সি বোলে মণিৰাম
- মণিৰাম কেহেলৈ গ'ল,
- ছকুৰি চিকাৰূপ কঁকালত বান্ধি লৈ
- মণিৰাম ভটীয়াই গ'ল।
- ৫২
- মাকে কান্দিলে গঞায়ো কান্দিলে
- কান্দিলে ডালৰে মিৰি,
- পাটীৰে তিৰুতাই কান্দে বিলাপ কৰি
- চুলি চিঙি কাতৰে ধৰি।
- ৫৩
- বৰখন বজাৰৰ তিল অ' মণিৰাম
- সৰুখন বজাৰৰ তিল,
- মণিৰাম দেৱানক ফাঁচীকাঠত তুলিলে
- গলিব ধৰিলে শিল।
- ৫৪
- লেঙি তামোলৰ পুলি ঐ মণিৰাম
- লেঙি তামোলৰ পুলি,
- মণিৰাম দেৱানক ফাঁচী দি মাৰিলে
- তললৈ নামিলে চুলি।
- ৫৫
- লৰে মাৰি ভাঙে শলেমাৰি
- গাহৰিয়ে ভাঙিলে গৰাল,
- শুকুৰবাৰৰ দিনাখন কালক্ষণ লাগিলে
- হাততে ঐ মণিৰাম হেৰাল।
- ৫৬
- জিলিকি আহিলে চৰা নাওখনি
- জিলিকি আহিলে টিং
- তাৰে মাজতে মণিৰাম জিলিকিল
- গলধনৰ চুলিতে চিন।
- ৫৭
- বৈ নববি চৈ ঐ মণিৰাম
- বৈ নববি চৈ,
- উধান যেন খোপা মই বান্ধি পঠিয়াম
- ৰংপুৰত মেলিবি গৈ।
- ৫৮
- ম'হত পৰিলে চুটীয়া শালিকা
- আমত মলিয়ালে মল,
- মণিৰাম দেৱানক যোৰহাটত মাৰিলে
- বুকু হমহমাই গ'ল।
- ৫৯
- আঠিয়া কলৰে আখা মণিৰাম
- আঠিয়া কলৰে আখা,
- মণিৰাম দেৱানক ফাঁচী দি মাৰিলে
- আমঠু পৰি গ'ল ক'লা।