পৃষ্ঠা:Ratneswar Bora Poem.pdf/৬১

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক
এই পৃষ্ঠাটোৰ বৈধকৰণ হৈছে

অনুভৱঃ কবিতা বিষয়ক

কবিতা আপডালৰ বস্তু
কিংকৰৰ সাঁচতীয়া গুটিধন
কবিতা বুকুৰ বান্ধৱ
ফুটপাথৰ নিৰন্ন জননাৰায়ণ

কবিতা হাতৰ ৰেখাৰ দীৰ্ঘ পৰমায়ু
অথবা এটি সুমিষ্ট প্ৰাদেশিক ফুল
কবিতা শান্তি সৰোবৰ আকাশ নিৰ্মল
কবিতা এচলু সুশীতল জল তলমল

কবিতা নিঃস্বজনৰ কৰুণ আৰ্তনাদ
কবিতা প্ৰাজ্ঞজনৰ হৃদয় কঁপোৱা আশীৰ্বাদ

আপুনি কবিতা পঢ়ক বা নপঢ়ক
কোনো কথা নাই
কবিতা থাকিব সদায়
হৃদয়ৰ ক’ৰবাত ৰাতি ৰাতি বাঁহীটি বজাই।

(পূৰ্বপ্ৰকাশঃ দৈনিক অসম, ১৭/০৬/২০১৮)

এমুঠি বনকৰা কিংখাপ কবিতা।৬৩