এই পৃষ্ঠাটোৰ বৈধকৰণ হৈছে
স্তুতি-মালা ৷
——————
ইষ্টদেৱ স্তুতি।
অজ্ঞান আন্ধাৰে সদা ঢাকি আছে মোৰ মন
দিয়া প্ৰভু জ্ঞানৰ পোহৰ;
ভক্তিহীন মূঢ়মতি তুমি বিনে নাই গতি
অন্ত কৰা মায়াৰ মোহৰ।
দুখ যদি আহে প্ৰভু কাতৰ নহওঁ যেন
ভাবোঁ জানো তোমাৰেসে দান;
তোমাৰ চৰণ চাই মনে জানো বল পাই
তোমাতেই মজি থাকে মন।
বিষয়তে থাকি যেন তোমাত নুগুছে ৰতি
সত্য বস্তু পাওঁ দৰশন;
সত্যৰ কাৰণে যেন সুখ ভোগ পৰিহৰি
লব পাৰোঁ সাৱটি মৰণ।
মৰণৰ ভয়ে প্ৰভু মনক ব্যাকুল কৰে
মায়াই আকুল কৰে প্ৰাণ;
ইতো দেহা যদি যাই আত্মাৰ মৰণ নাই
দিয়া প্ৰভু এই সজ জ্ঞান।