এই পৃষ্ঠাটোৰ বৈধকৰণ হৈছে
১৮৪
ভক্তি-ৰত্নাৱলী
লভে যেন ফল পূজা কৰি দ্বাপৰত।
কলিত কীৰ্ত্তনে তাক পাৱয় সমস্ত॥
কীৰ্ত্তনৰ ফল আৰো অধিক পাৱয়।
এতেকেসে কলিযুগ শ্ৰেষ্ঠ অতিশয়॥৮৬৩॥
বুলিবাহা তবে কোন গুণ মাধৱৰ।
কৰিব কীৰ্ত্তন শুনা ইহাৰ উত্তৰ॥
অনন্ত কৃষ্ণৰ চৰিত্ৰৰ নাহি অন্ত।
আপুনিও কৃষ্ণে যাৰ অন্ত নাপাৱন্ত॥৮৬৪॥
নিৰ্ণয় কৰিবে তাক কাহাৰ শকতি।
চাহে যিটো জনে তাক গণিবাক প্ৰতি॥
তাত পৰে নাহি মন্দমতি সংসাৰত।
লৈয়োক ইহাৰ সাক্ষী কৃষ্ণৰ বাক্যত॥৮৬৫॥
বোলন্ত উদ্ধৱ শুনা কহো স্বৰূপত।
সাত পৃথিৱীৰ পৰমাণু আছে যত॥
বিস্তৰ কালেসে যেবে মই মাত্ৰ তাক।
গণি সংখ্যা কৰিয়া পাৰোহো কহিবাক॥৮৬৬॥
তথাপিতো মায়া-বলে সৃজি আছো যত।
নপাৰোহো গণিতে ব্ৰহ্মাণ্ড আছে কত॥
ময়ো নজানোহো ব্ৰহ্মাণ্ডৰ সীমা যত।
নাম গুণ বিভুতি যতেক আছে তাত॥৮৬৭॥
কাহাৰ শকতি তাক কৰিৰেক অন্ত।
এতেকে উদ্ধৱ মোৰ চৰিত্ৰ অনন্ত॥
