এই পৃষ্ঠাটোৰ বৈধকৰণ হৈছে
◇ বিহুগীত ◇ ৬৪ ◇
(১৪)
অলনি দলনি পকা চপৰাণি
আৰুবা কিমানৰ দূৰ।
কতেনো ছোৱালী পালাগৈ গোহাঁই দেউ
বাটৰো নপৰে ওৰ॥
(১৫)
বৰমপুতৰ মাজৰে বৰহমথুৰি আনিবা
গুৱালৰ আনিবা দৈ।
নাজিৰা হাটৰে জেতুকা আনিবা
থাকিম পদূলিতে ৰৈ॥
(১৬)
নালেনাই বিচনী কেলৈ বনাইছিলা
নপৰে বতাহৰ বা।
দকৈ পুখুৰী কেলৈ খনাইছিলা
চেনায়ে নোধোৱে গা॥
(১৭)
চাহপাত চিঙিলো চটাইতে মেলিলো
তেতেলি পতীয়া হ'ল।
শহুৰৰ পুতেকটি নিচেই কৈ অবুজন
বাটত ভেটা ভেটি হ'ল॥
(১৮)
ওলাই দেখা পালো চেহাবৰ বঙলা
বিজুলি জ্বলিলে বাতি।
সপোনত মইনাজান দিছিলা প্ৰেমদান
টোপনি নাহিলে ৰাতি॥
(১৯)
মাছৰে চিকুণে খলিহা বৰণে
চৰাইটি চিকুণে কুলি।
চেনেহী চিকুণে কেতেকী বৰণে
আছিলি কঠীয়া তুলি॥
(২০)
জোকাৰি পিন্ধিলো সিংখাপৰ মেখেলা
কোবাই বান্ধি ললো চুলি।
দাপোণতে চাই সেন্দুৰ ফোঁট পিন্ধিলো
বিহুলৈ ওলাই যাওঁ বুলি।