এই পৃষ্ঠাটোৰ বৈধকৰণ হৈছে
পাতনি।
বাখৰ।
সংসাৰ-চক্ৰত পৰি টোকে চকুপানী
নবীন পথিকে দেহি, বাট হেৰুৱাই;
বাখৰৰ জেউতিয়ে তৰাটিৰ দৰে
জীৱনৰ বাট যেন দিয়ে পোহৰাই।
আন্ধাৰত দেখি সেই পোহৰৰ ৰেখা,
আশাৰ পুলিটি যেন উঠে ঠন ধৰি;
বাজক নতুন সুৰে সুখৰ সঙ্গীত,
উঠক প্ৰাণত পুনু আনন্দ-লহৰী।
ফুলেৰেই ভৰে যেন হৃদয়-ফুলনি,
সুবিমল শান্তিময় সুখ-কিৰণত,
সমাপি জীৱন-ব্ৰত হাঁহিমুখে সবে
লভোঁ যেন শেষ শান্তি ঈশ-চৰণত।
যতীন্দ্ৰনাথ দুৱৰা।
