এই পৃষ্ঠাটোৰ বৈধকৰণ হৈছে
প্ৰতিধ্বনি
(৯০)
গহীন গিৰি-উপত্যকাৰ তীৰ্থ মোৰ পৰ্বতীয়া
দেৱতাৰ লীলাভূমি কল্পনাৰ কবি-প্ৰিয়া
যি দিন হল কিৰণময়
প্ৰাগজ্যোতিষৰ অভ্যুদয়
হিমাদ্ৰি-কোলাত পিন্ধি মেঘাম্বৰী মেখলা
সিদিন ধৰি জগত-জিনা জননী মোৰ উজ্জ্বলা,—
মৰকতৰ শ্যামল গিৰি
হৰিত-পথাৰ থলে বেঢ়ি
কুঁৱলীৰে আলফুল পাটৰ আঁচল উৰি
ৰ’দ-কাচলিত ইন্দ্ৰ-ধনুৰ ৰঙিন কল্কা তুলি;—
তটিনী গল বুকু জুৰাই
—জোনালীয়ে গা ধুৱাই
—দিগ-বধূৱে নিজান কোণত প্ৰভাতী গীত গাই,
ভাস্কৰে কণক-ৰাগে দিলেহি জগাই;—
টিঙে টিঙে ধৱল মঠৰ
কলচী চৰিল সোণৰ
আকাশ-বন্তি লগালে যত নিতে ইন্দু-অৰুণে
ফুল-ৰেণুৰ অঞ্জলি দি আৰতি গায় পৱনে।
⸺⸺
১৮৩৯ শক |