এই পৃষ্ঠাটোৰ বৈধকৰণ হৈছে
৬৭
নীতিসাৰ।
৮। এলাহে জীৱন চুটি কৰে, কিন্তু শ্ৰম কৰিলে মানুহ দীৰ্ঘজীবী হয়।
৯। গা ভালেই হে সকলো ভাল।
১০। কেতিয়াও মিছা নকবাঁ; ধেমালিতো মিছা কোৱা অযুগুত। মিছাৰ সমান শত্ৰু নাই; সঁচাৰ সমান মিত্ৰ নাই। সঁচাই পৃথিবীত কৰিব লগীয়া কাম উজু কৰে, আৰু স্বৰ্গলৈ বাট মুকলি কৰে।
১১। চুবুৰীয়াৰ অহিতে তুমি কেতিয়াও মিছা সাক্ষী নোলাবাঁ।
১২। কুমলীয়া এচাৰি যিফালে পোনোৱা যায় সেই ফালেই পোন হয়; কিন্তু বুঢ়া হলে পোনাওঁতেই সি ভাগি যায়। সেইদৰে কুমলীয়া বয়সেই হে মানুহৰ সজ বাট ধৰিবৰ সময়।
১৩। জীৱনৰ আগছোৱাত যি শান্ত, তাক হে শান্ত বুলিব লাগে;বয়সে জুৰুলা কৰিলে নো কোন্ শান্ত নহয়?
১৪। আৰ্জিলে ফল ভূঞ্জিবই লাগে; সেই কাৰণে পাপ আৰ্জিলে তাৰ নিকাৰ ভূঞ্জিব লাগে, আৰু পুণ্য আৰ্জিলে শান্তি লভিবলৈ পোৱা যায়।
⸻
