এই পৃষ্ঠাটোৰ বৈধকৰণ হৈছে
২৫
দীপ্তি ৷
এৰি ভেদ-ভাব কৰা নে প্ৰাৰ্থনা
শিষ্যৰ কাৰণে অন্তৰ খুলি?
যদি সেয়ে হয়, তোমাৰ পাৱত
কৰোঁ নমস্কাৰ সহস্ৰবাৰ?
তোমাৰ দীক্ষাৰ দীপ্ত আলোকে
দিব দেখুৱাই মুক্তিৰ দ্বাৰ।
যদি হে মিছাই গুৰু-আসনত
বহিছা স্বাৰ্থৰ দোকান পাতি,
কৰ-বৰঙ্গনি কৰিছা আদায়
অন্ধ বিশ্বাসী মানুহ মাতি?
নিজেই নুবুজি ব্ৰহ্মৰ স্বৰূপ
অলিয়া-বলিয়া যি পোৱা গাই,
ফাঁকি দি লোকক ধন ঘটি লৈ,
আছা মাথোঁ নিজে সুখেৰে খাই।
যদিহে নিজক ভগবান পাতি
আন সকলোকে কৰিছা ঘিণ,
তেনে হলে তুমি নোহোৱা তো গুৰু,
ভণ্ড, শঠ, তুমি পাতকী হীন।
সত্য সনাতন ব্ৰহ্মৰ জেউতি
যদিহে নেদেখা সবাৰে গাত;
তেন্তে নিজে থাকি অন্ধকাৰত
কিদৰে অন্ধক দেখাবা বাট!
