এই পৃষ্ঠাটোৰ বৈধকৰণ হৈছে
৩
চন্দ্ৰাৱলী।
মোৰ পক্ষে কি কৰিলে ভাল
তাৰ এটা সজ বুদ্ধি দিয়া।
সুৰথী। আহিছে গৰাকী সৌৱা,—
জনাৰ্দ্দন অগ্ৰজ তোমাৰ।
পুষ্কৰ। আঁতৰা সুৰথী তুমি,
শুনিবা কি দৰে মোক কৰে ব্যৱহাৰ।
জনাৰ্দ্দনৰ প্ৰবেশ।
জনাৰ্দ্দন। কি কৰিছ,—কিয় আছ মনে মনে বহি?
পুষ্কৰ। শুনিলে সন্তোষ পাবা,—
এলাহৰ বশ হৈ ঈশ্বৰৰ পৰা পোৱা
সকলো শক্তিৰ মাথোঁ
হানি মই কৰিছোঁ ইয়াত।
জনাৰ্দ্দন। বহি থাকি একো নকৰিলে
ভৰাবি কিহেৰে পেট,
কোনে তোক অবাবত দিব খাবলৈ?
পুষ্কৰ। নাই কৰা নষ্ট মই পৈতৃক সাহোন,
কিবাবে ভুগিম দুখ? পিতৃ সম্পতিত
তুমি মই সমানভগীয়া।
জনাৰ্দ্দন। পাইছনে গম কত বহি আছ?
পুষ্কৰ। পাইছোঁ, তোমাৰ চোঁতালত।
জনাৰ্দ্দন। ইমান ডাঙ্গৰ কথা!
বুজিছনে কাৰে কথা পাতিছ এতিয়া?
