এই পৃষ্ঠাটোৰ বৈধকৰণ হৈছে
কম্বু কণ্ঠে কৌস্তুভ প্ৰকাশে।
সূৰ্য্য যেন উদিত আকাশে।
সিংহবন্ধ স্কন্ধ সুপ্ৰমাণ।
ভুজ যুগ ৰত্নৰ মোলান।
কেয়ুৰ কঙ্কণ তাতে জ্বলে।
ৰত্নৰ গুলিয়া শোভে গলে।
হিয়াত শ্ৰীবৎস কৰে কান্তি।
যেন মেঘে বলাকাৰ পান্তি।
পীত বস্ত্ৰে শোভে তনু কালা।
আপাদ লম্বিত বনমালা।
তাতে পৰি অনেক ভ্ৰমৰে।
মধুলোভে পৰিয়া গুঞ্জৰে।
বক্ষস্থলে মুকুতাৰ হাৰ।
আকাশী গঙ্গাৰ যেন ধাৰ।
ৰত্নৰ মেখলা কটি মাজে।
সোণৰ কিঙ্কিণী তাতে বাজে।
কৰি-কৰ উৰু নিৰুপম।
চৰণ পঙ্কজ মনোৰম।
