এই পৃষ্ঠাটোৰ বৈধকৰণ হৈছে
নয়নে দেখিবোঁ মই চৰণ কমল।
আজিসে জন্মৰ মোৰ হৈবেক সফল॥
দণ্ডৱতে পৰিবোঁহোঁ কৃষ্ণৰ চৰণে।
কৃষ্ণে মোক আশ্বাসিব মধুৰ বচনে॥
খুৰা বুলি কৃষ্ণে মোক কৰিব আহ্লাদ।
ব্ৰহ্মাৰ দুৰ্ল্লভ তেবে লভিবোঁ প্ৰসাদ॥
হেন মনে গুণি ৰথে লৰিল অক্ৰুৰ।
গোধূলিকা বেলাত পশিলা গোপপুৰ॥
মাধৱৰ খোজচয় দেখিল ভূমিত।
ধ্বজ বজ্ৰ পঙ্কজ অঙ্কুশে সুশোভিত॥
ৰথৰ নামিয়া বেগে কৃষ্ণ কৃষ্ণ বুলি।
শিৰে আনি ঘসিল খোজৰ যত ধূলি॥
পাছে গৈয়া কৃষ্ণক দেখিল আনন্দতে।
কৃষ্ণ কৃষ্ণ বুলিয়া পৰিল দণ্ডৱতে॥
কৃষ্ণে ধৰিলন্ত তাঙ্ক আঙ্কোৱালি তুলি।
সতকাৰ কৰিল অক্ৰুৰ খুৰা বুলি॥
