এই পৃষ্ঠাটোৰ বৈধকৰণ হৈছে
৮৫
অসমীয়া মহাভাৰত
বৈশম্পায়ন বদতি শুনিয়ো নৰেশ্বৰ।
আত অনন্তৰে কথা শুনা কৌৰবৰ॥
যি বেলাত কৌৰবৰ গৃহ পৰিহৰি।
বিদুৰৰ গৃহে গই ৰহিলন্ত হৰি॥৩৭৫
সেহিবেলা উঠি দোৰ্য্যোধন মহাৰাজ।
খঙ্গে গৈয়া ভিতৰত পাতিলা সমাজ॥
কৰ্ণ দুঃশাসন চিত্ৰসেন ৰিবিংশতি।
শকুনি সহিতে আৰো অসংক্ষ নৃপতি॥৩৭৬
আছিলেক মানে চলি গৈলা সামৰাজে।
ভীষ্ম দ্ৰোণ বিদুৰ যে তিনি জন বাজে॥
মাধৱক কোপে দোৰ্য্যোধন নৃপবৰে।
বিষ লগা সৰ্প যেন নাকে বিষ পৰে॥৩৭৭
দুয়ো ওঠ কম্পে কোপে নয়ন ফুৰাই।
বুলিবাক লাগিলা কৰ্ণৰ মুখ চাই॥
দেখা দেখা কৰ্ণ তুমি কৃষ্ণৰ মহত্ত।
সভামাজে মোক লাজ কৰিলেক যত॥৩৭৮
সভামাজে হাতে ধৰি গৈলো মাতিবাক।
নুবুলিল মোক আৰু আখাৰেক বাক॥
আৰো বোলে অন্ন নুভুঞ্জিবো তযু ঘৰে।
দেখা দেখা অৱহেলা মোক যদি কৰে॥৩৭৯
(৮)
