এই পৃষ্ঠাটোৰ বৈধকৰণ হৈছে
ব্যৰ্থতাৰ সুৰ (বন্ধু বিয়োগত)
কত দূৰ দূৰণিৰ
নজনা দেশত
ফুলি থকা শেৱালিৰ
বগা পাহিটিত,
মলয়াৰ ঢৌৱে আহি
কৈ গল হৃদয় কঁপাই
কাণে কাণে অদূৰৰ
মৰণৰ বাতৰি জনাই।
সৰি গল ফুলি থকা
শেৱালিৰ বগা পাহিকিটি
লাহে লাহে আতঁৰিল
সুকোমল দেহাৰ মাধুৰী,
মাৰ গল চিৰদিনলৈ
শেৱালিৰ শুৱনী ছবিটি—
অবিচ্ছেদ আশাৰ হাঁহিটি।
সৰি থকা শেৱালিৰ
আলসুৱা কোমল হিয়াত
পৰি গল নিয়ৰৰ
চকুলো মলয়াৰ বা’ত।
