এই পৃষ্ঠাটোৰ বৈধকৰণ হৈছে
প্ৰয়াণ
(ভূলুণ্ঠিত তেলী কদম জোপাৰ সোঁৱৰণত)
গুণ গুণ বতাহৰ নিচুকণি গীত শুনি
ভাগৰুৱা নিশা সাৰে থাক তই
ডাউকী আৰু কেতেকীৰ বিহ্বল যুগলবন্দীয়ে
ফেঁহুজালি দিওঁতেই বুকুত ফুটাৱ তোৰ
আলফুল কতনা তৰাফুল মাখনবুলীয়া।
ওপজা গাঁৱৰ মোৰ
প্ৰাচীন প্ৰহৰী তই
বালিবাট আৰু চেঁচাবাটে য’তেই সলায় কান্ধ
তাতেই আছিলি তই
কদম তেলী বহু শতিকাৰ
ভাত আৰু মাতহাৰা
পৰিভ্ৰমী মানুহৰ নীৰৱ সাক্ষী কত আশা-নিৰাশাৰ।
শীতল ছায়াত তোৰ জিৰাইছিলনে
মেট্ৰ’চাহাবৰ আলিগঢ়া বনুৱাৰ
ৰ’দে পোৰা শৰীৰৰ ক্লান্তি
দিছিল হয়তো চকুৰ পতাত সানি
দুটোপাল ফটিক পানী
আইৰ সাদৰী চুমাৰ।
