জাগা জননীৰ সন্তান

by জ্যোতিপ্ৰসাদ আগৰৱালা

জাগা জননীৰ সন্তান
জাগা শক্তিমান জাগা মুক্তিপ্ৰাণ৷

মৃত্যু গছকি আনা জয়জিনি
কৰি দুৰ্জ্জয় অভিযান৷

কৰ্ম্মহীনতা কাপুৰুষতাই
তোমাক কৰিলে জয়
তুমি দুৰ্ব্বল ম্ৰিয়মান
তথাপিও নাই ভয়--
জাগা শক্তিমান জাগা মাতৃপ্ৰাণ৷

শক্তিগায়ত্ৰী মনত পেলোৱা হবা দুৰ্নিবাৰ
তেতিয়া তোমাৰ জয় নিনাদত শত্ৰু কম্পমান৷

অ’ মোৰ আপোন পাহৰা দুৰ্ম্মদ বীৰ
অজেয় নৱ-জোৱান
জাগা শক্তিমান জাগা মাতৃপ্ৰাণ৷৷