জয় জয় জগজন তাৰণ-কাৰণ

by শ্ৰীমন্ত মাধৱদেৱ

                                  ।। ৰাগঃ কল্যাণ।। তালঃ যতি।।

                                ধ্ৰুং।। জয় জয় জগজন তাৰণ-কাৰণ
                                        নাৰায়ণ বৰ দেৱং।
                                        হৰ চতুৰানন আদি অমৰগণ
                                        যাকৰ কৰু পদ সেৱং।।

                               পদ।। ৰোম বিবৰ মহ কোটি কোটি অণ্ড
                                       তাহুৰ সব কৰু ৰেণু।
                                       নিজ জন ৰঞ্জন ভঞ্জন ব্ৰজ দুঃখ
                                       মোদিত বাৱত বেণু।।
                                       কলসী ভাঙ্গল দধি সব নাশল
                                       কৰত ভোজন নবনীতং।
                                       ভীতি পলাৱল জননী বান্ধল
                                       অৰ্জ্জুন ভঞ্জন ধৃতং।।
                                       নাচত গাৱত ভাৱ দেখাৱত
                                       হাসত বহু ৰস লাসে।।
                                       হৰিকহু চৰণ কমল-মধু-আশে
                                       কহয় মাধৱ দীন দাসে।।