গাঁৱৰে ডেকা মই
গাঁৱৰে ডেকা মই
গাঁৱৰে ডেকা
নুশুনো ছলাহীৰ
কথা একা বেঁকা
মই ন পোহৰৰ ডেকা ৷
কৌটিকলীয়া
চকুৰে চামনি
এৰুৱাই পৃথিৱী চাওঁ
নাঙলৰ শিৰলুত
লিখা কথাখিনি
এতিয়াহে বুজি পাওঁ ৷
মাটি মোৰ আপোন ঐ
মাটি মোৰ সপোন ঐ
মাটি মোৰ নিজাপী ঘৰ
নাঙলৰ ফালেৰে
মাটিত ভাইগ’ আঁকো
মাটিকে মাগিছোঁ বৰ ৷
মাটিয়ে পোহৰে
গুণাগঁথা কৰি
মানুহকৈ স্ৰজিলে মোক
পেটৰে পোৰণি
মাটিয়ে গুচাই ঐ
পোহৰে মনৰে ভোক ৷
গাঁৱৰে ডেকা মই
যাৱে আগেবাঢ়ি
আঁতৰাই জেঙনি
চাই কি পোহৰৰ হেঙুলি ৰেঙণি
মচি যাম মচি যাম আমাৰে মুখৰে
যাউতীযুগীয়া চেকা
গছকি খচকি বোকা আগেবাঢ়ো
মই গজলীয়া, মই গাঁৱলীয়া
ন পোহৰৰে ডেকা ৷৷