এই পৃষ্ঠাটোৰ বৈধকৰণ হৈছে
(ৰজা, মন্ত্ৰীসকল আৰু সভাসদবৰ্গ।)
ন্যায়সোধা ফুকন।—কি বুলি বিহিবাঁ দণ্ড, নিৰ্দোষী জনক?
গদাপাণি অপৰাধী নেদেখোঁ একোতে।
বু: গো:।—ৰাজাজ্ঞা পালন হেতু, দোষৰ বিচাৰ
নালাগে হে হেৰা!
ফুকন।—কিবা কোৱাঁ ডাঙ্গৰীয়া।
শাসন-বিধান এৰি, ৰাজাজ্ঞা কি বোলাঁ?
বৰবৰুৱা।— ৰজাৰ মঙ্গল হেতু, নহয় অবিধি;
নাভাবোঁ অকৰ্ম্ম একো।
বৰপাত্ৰগোহাঞি।—মোৰো সেয়ে মত।
ৰজাৰ মঙ্গলে জানাঁ, ৰাজ্যৰ মঙ্গল।
বু: গো:।—নামাতিবাঁ হেৰা আৰু; তোমাকে মাতিছোঁ।
নুতুলিবাঁ আপত্তি বিশেষ। ভাবি-চিন্তি
দিছোঁ মত, গদাপাণি অঙ্গক্ষত হেতু।
ফুকন।— নধৰিবাঁ মোক।
নোৱাৰিছোঁ দিব মত। নিৰ্দ্দোষী জনৰ
অবাবত অঙ্গক্ষত নহয় যুগুত;—
তাতে গদাপাণি হেন পুৰুষ প্ৰধান,
লভিছে জনম যি ঘোৰ সমস্যাত
ৰাজ্যৰ মঙ্গল হেতু।
৯