এই পৃষ্ঠাটোৰ বৈধকৰণ হৈছে
অক্ৰুৰক পাঠায়া গৃহক আগ কৰি।
লৈয়া গোপগণ সঙ্গে ৰঙ্গে ৰাম হৰি॥
পৰম আনন্দে প্ৰবেশিল মথুৰাত।
সিটো বিতোপন পুৰী দেখিল সাক্ষাত॥
স্ফটিকে গঠিত পুৰদ্বাৰ নুহি খাট।
লগায়াছে সুবৰ্ণৰ বৃহত কপাট॥
হেমময় তোৰণ চিড়নে অলঙ্কৃত।
চতুৰ্ভিতি গড়খাই দেখি ভয় ভীত॥
বহুবিধ উদ্যানে শোভিত কাছে কাছে।
শাৰী শাৰী গৃহসব প্ৰকাশন্ত আছে॥
হীৰা মৰকত ৰত্নে ৰঞ্জে ঠাৱে ঠাৱে।
শোভা কৰে পাৰাৱত ময়ুৰৰ ৰাৱে॥
ৰাজপন্থ চৌপন্থাক সাঞ্জি মাঞ্জি আতি।
পদূলি পদূলি দীপ ঘট আছে পাতি॥
হেন নগৰত পশি গোপগণ সঙ্গে।
ৰাজপথে চলি যান্ত ৰামকৃষ্ণ ৰঙ্গে॥
মিলিল উৎসৱ শুনি নাৰীগণ যত।
চাহিবাক লাগি সবে চৰিলা গৃহত।
