এই পৃষ্ঠাটোৰ বৈধকৰণ হৈছে
দেৱধ্বনি
(৩১)
জেৰেঙা পথাৰ!
জেৰেঙা পথাৰ!
সমাধি-তীৰ্থ সতী জয়াৰ-
মলিন মৌন অন্ধকাৰ!
বহল বিশাল পাৰ!
উৰুঙা হিয়াৰ,
—জেৰেঙা পথাৰ!!
কিহেৰে ৰুধিবি অশ্ৰু গঙ্গা,
কিহেৰে জুৰাবি অন্তৰ্দাহ?
নিৰ্য্যাতিতা অবলাৰ
তপ্ত ৰুধিৰ-ধাৰ,—
শোকাচ্ছন্ন দিগ-দিগন্তৰ গভীৰ ৰুদ্ধশ্বাস;
কিহেৰে নুমাবি জুই, কলঙ্ক পেলাবি ধুই
মছিবি ইতিহাস?
সতীৰ তেজেৰে অগনি জ্বলালি,
কৰিলি প্ৰৱলৰ গৰ্ব্ব নাশ।
ভুঞ্জি যাতনা জীয়াতু ক্লেশ
উপজিল দেৱী তিয়াগি দেহ,
মৰণৰে পৰা উঠিল অমৰা জিলিকাই ইতিহাস!
বীৰাঙ্গনাৰ বিজয়-শয্যা মূৰ্ত্তমহিমাধাৰ,—
জেৰেঙা জাতিকাৰ!
কাতি, ১৮৪৮ শক ]
