এই পৃষ্ঠাটোৰ বৈধকৰণ হৈছে
৪৯
কুমৰ-হৰণ
বহুবিধ সংযোগে সাজিল পৰমান্ন।
পিষ্টক সাজিল তাই নানা বিধ ঠান॥
মগুৰ ডালিত ঘৃত চিনি চুড়া দিল।
আতি ভাল কৰি তাক মসূৰে ৰঞ্জিল॥
আদা লোণ য’নী জীৰা মৰীচক দিল।
ভাজিলে খাসীৰ মাংস বাখৰে ৰঞ্জিল॥
পাৰাৱত আনি তাই কৰিলেক জলা।
কচ্ছপৰ মাংসত দিলেক বৰকলা॥
হৰিণৰ মাংস সমে হিঙ্গৰ ফোটন।
ৰম্ভামূলে বৰাহৰ মাংস বিতোপন॥
চিত্ৰফণী চিত্ৰলেখা দিলেক কৰ্পূৰ।
বড়ালিৰ ঘান্টি লাড়ি মৎস্যত মসূৰ॥
কচে বচে বেসুৱাৰি শৌলে মূলে সঙ্গ।
ডৰিকে বেঙ্গনে আৰি মাছত পালঙ্গ॥
কাঠিঅৰা কৰে তাই ইলিহ কান্দোল।
জামীৰ শোলঙ্গ দিয়া লফাৰ আমোল॥
ঘৃতৰ তেলনী দিয়া মৌয়ে সমে ঝোল।
আছোক ভুঞ্জিবে তাক গন্ধতে আমোল॥
বদৰী ৰসত চিনি অণ্ড মিশলাইল।
পকা তেন্তেলিত গুড় ৰস আনি দিল॥
৪
