এই পৃষ্ঠাটোৰ বৈধকৰণ হৈছে
মেকুৰীৰ ডিঙিত টিলিঙা মই আঁৰিম কিজানি
সপ্তাহ দিন অৱস মোৰ শৰীৰ
ঢাকুমকুমা বজোৱা এটা জ্বৰ
চিকিৎসকে কৈছে ভাইৰেল ফেভাৰ
ঔষধ খাইছোঁ শলাগছি জ্বলাই কাবৌ কৰিছোঁ
জৌ জৌকৈ ঘামি নামি গৈছে শৰীৰৰ উত্তাপ
আঁতৰি গৈছে মনৰ উদ্বেগ
যোৱাটো ব’হাগত
নেৰা নেপেৰা ডাৱৰীয়া বতৰত
বাঁওহাতৰ জোৰা লৰিল
হঠাৎ পিছলি পৰি নিজৰে চোতালত
আগবাঢ়িল প্লাষ্টাৰ পেইন কিলাৰৰ বিশাল সমদল
কাতিৰ ৰাতি পাটীত পৰি ইকাতি সিকাতি
পেটত শানে কটা ভোক
চিলমিল টোপনিত জিলমিল সুৱাগমণি ধানৰ থোক
সাংঘাতিক দুখ এটাই গচকি খাস্তাং কৰিছে মোক
মই কৰিছোঁ এজন ভাল চিকিৎসকৰ সন্ধান
যি দিব পাৰে মোৰ ব্যাধিৰ সঠিক নিদান
নাজানো অন্ধ ঈশ্বৰ কোন মন্দিৰত বন্দী
মেকুৰীৰ ডিঙিত টিলিঙা মই আঁৰিম কিজানি।
(পূৰ্বপ্ৰকাশঃ ৰঙালী বিহু বিশেষ সংখ্যা জনমভূমি, ২০১৫ চন)
২৬।এমুঠি বনকৰা কিংখাপ কবিতা