পৃষ্ঠা:Ratneswar Bora Poem.pdf/২৯

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক
এই পৃষ্ঠাটোৰ বৈধকৰণ হৈছে

আপুনি নজনাকৈয়ে

আপুনি নজনাকৈয়ে আপোনাৰ বুকুত
ডেও দি ফুৰিব পাৰে ৰুণুক জুনুক
এটি আশাৰ হৰিণা পোৱালি
লহপহকৈ বাঢ়িব পাৰে চিৰিলিপতীয়া
এটি নোদোকা চতিয়না পুলি
আনকি উৰিব পাৰে মুক্ত মনে
এহাল বনৰীয়া ৰাজহংস
পাখি মেলি জুখিব পাৰে আপোনাৰ
হৃদয় আকাশৰ বিশাল দিগন্ত
আৰু এনেকৈয়ে মেলিব পাৰে পোখা
আপোনাৰ কংক্ৰিটৰ মন মণিকূটত
ৰাগ শ্যাম তাল পৰিত এটা বৰগীত
তেজৰে কমলাপতি পৰভাতে নিন্দ
তেৰি চান্দ মুখ পেখোঁ উঠৰে গোৱিন্দ।

(পূৰ্বপ্ৰকাশঃ দৈনিক অসম, ০৯/০১/২০১১)

এমুঠি বনকৰা কিংখাপ কবিতা ।৩১