পৃষ্ঠা:Kirtan Ghosha.pdf/৩০৮

ৱিকিউৎসৰ পৰা
এই পৃষ্ঠাটোৰ বৈধকৰণ হৈছে
কীৰ্ত্তন ২৫
২৯৭
কংস-বধ


পঞ্চবিংশ কীৰ্ত্তন

ঘোষা॥ গোৱিন্দ যদুদেৱ দীন-দায়াশিল।
 তুমিসি বান্ধৱ কৃষ্ণ আৱেসে জানিলো॥২৫

পদ॥ অক্ৰূৰক পঠায়া গৃহক আগ কৰি।
 লৈয়া গোপগণ সঙ্গে ৰঙ্গে ৰাম হৰি॥
 পৰম উৎসুকে প্ৰৱেশিলা মথুৰাত।
 সিটো বিতোপন পুৰী দেখিলা সাক্ষাত॥ ৩০৫
 স্ফটিকে গণ্ঠিত পুৰ-দ্বাৰ নুহি খাট।
 লগায়াছে সুৱৰ্ণৰ বৃহত কপাট॥
 হেনময় তোৰণ চিড়লে অলঙ্কত।
 চতুৰ্ভিতি গড়খাই দেখি ভয়-ভীত॥৩০৬
 বহুবিধ উদ্যান শোভিত কাছে কাছে।
 সাৰি সাৰি গৃহসৱ প্ৰকাশন্তে আছে॥
 হীৰা মৰকত ৰত্নে ৰঞ্জে ঠাৱে ঠাৱে।
 শোভা কৰে পাৰাৱত ময়ূৰৰ ৰাৱে॥ ৩০৭
 ৰাজপন্থ চৌপন্থাক সাঞ্জি-মাঞ্জি আতি।
 পদুলি পদুলি দীপ-ঘট আছে পাতি॥
 হেন নগৰত পশি গোপগণ-সঙ্গে।
 ৰাজপথে চলি যান্ত ৰাম-কৃষ্ণ ৰঙ্গে॥ ৩০৮