এই পৃষ্ঠাটোৰ বৈধকৰণ হৈছে
সৌন্দৰ্য্য আৰু কবি
সৌন্দৰ্য্য,
কত আভা, কত প্ৰভা, মনোলোভা
মনোৰমা,
কত কবি, কত ছবি, যাচে চুমা
নিৰুপমা,
কত অলি, পৰি ঢলি, প্ৰাণ-ঢালি
প্ৰেমে পমা,
মাতে সখি, আছো ৰখি, আঁহা প্ৰিয়ে
প্ৰিয়তমা!
—ইয়াতো কবিৰ প্ৰাণ ইনাই বিনাই
ফুটুকা ফুলতো দেহি ফেঁটী সাপ পায়॥
✷ ✷ ✷
কবি,
শান্ত জুৰ, সুমধুৰ, মোৰ সুৰ
প্ৰেমে পূৰ,
হে চতুৰ, কাব্যচোৰ, কিয় টোকা
চকুলোৰ?
সৌ হিৰণ, ঢৌ-কিৰণ, মৌ-মিলন
নোহে দূৰ,
ত্যজি দ্বেষ, হিংসা-বেশ, চোৱা ঘূৰি
স্বৰ্গপুৰ।
—নোৱাৰা সাধিব কবি সৌন্দৰ্য্যৰ নাশ,
সৌন্দৰ্য্য আপুনি হব আপুনি প্ৰকাশ!
⸻
[ ৬ ]
