এই পৃষ্ঠাটোৰ বৈধকৰণ হৈছে
হ’ক উচ্চাৰিত পুনু
“মা নিষাদ প্ৰতিষ্ঠাং ত্বমগম শাশ্বতী সমাঃ......”
ৰঙা লুইতৰ অটল তলিত
নীলা পাহাৰৰ শিখৰে শিখৰে
হব প্ৰতিধ্বনি তাৰ ,
থমকিব স্বৰ্গলিপ্সু, অসুৰ পুঙ্গৱ।
বাঙ্ময়ী ৰূপে তোক প্ৰণিপাত কৰো বুলি
জাকে জাকে আহিব লৱৰি
থলুৱা পমুৱা যত অসমীয়া ন-অসমীয়া।
আকাশত শ্বহীদৰ অমৰ আত্মাই
হাঁহিৰ বিজুলী চমকাব;
লুইতৰ ইপাৰে সিপাৰে
লাখ লাখ ধন্টি অনিলে
হিয়াৰ তাঁৰত তুলি মাতৃ বন্দনাৰ সুৰ
মৰ্ম্মদাহ তোৰ পাহৰাব।
অক্টোবৰ, ১৯৭৩ চন।
॥ হৃদয়ৰ অৰণ্যত॥ ৪৩
