পৃষ্ঠা:হৃদয়ৰ অৰণ্যত.pdf/২৫

ৱিকিউৎসৰ পৰা
নেভিগেশ্যনলৈ যাওক সন্ধানলৈ যাওক
এই পৃষ্ঠাটোৰ বৈধকৰণ হৈছে

বোধন

অসমৰ কাশীপুৰী পুন্যপীঠ বৰপেটা ধাম;
শুচি দেহ, শুচি মন
ভকতিৰ এগছি চাকিৰে
গৈছিলো সেৱাটি জনাওঁ বুলি কীৰ্ত্তন ঘৰত।
আচম্বিতে কোনোবাই যেন
মোৰ চেতনাত কৰে পদাঘাত
সকিয়ালে সমুখৰ শিলৰ ফলকে
জোতা আৰু তিৰোতাৰ প্ৰবেশ নিষেধ।
মই থৰ লাগি চাই ৰ'লো
অনাচাৰী ভ্ৰষ্টাচাৰী
দুৰ্নীতি দুষ্কৃতিকাৰী
সকলোৰে বাবে অবাৰিতদ্বাৰ,
‘যত্ৰ জীৱ তত্ৰ শিৱ’
ঈশ্বৰৰ সেৱাৰ থলীত
মাথো তিৰোতাৰ নাই অধিকাৰ।
মোৰ ৰক্তমাংসে দহ মাহে
তিলে তিলে গঢ় দিলো যাক
মোৰ মৃত্যু-যন্ত্ৰনাতে জন্ম যাৰ
ৰক্ত ক্লেদময় দেহা, অসহায় মানৱ সন্তান,
মোৰ বুকুৰ মৰম আৰু অমৃত ধাৰাই
দিলে যাক আকাশ পৃথিবী আৰু গোলাপী সপোন
সেই সন্তানেই মাতৃত্বৰ কৰে অপমান;
স্বৰ্ণসীতা নিৰ্বাসিত, হেৰুৱালে অধিকাৰ সহধৰ্মিনীৰ।