এই পৃষ্ঠাটোৰ বৈধকৰণ হৈছে
৭৪
স্ততিমালা
অধিভূত অধিদৈব অধিযজ্ঞচয়ে
কৰে যদি তোমাৰ ভজন;
যোগভ্ৰষ্ট কদাপিও নহয় সিজন
ধ্ৰুব সত্য গীতাৰ বচন।
নাই শ্ৰদ্ধা ভক্তি জ্ঞান পাপতেই মতি
দানধ্যান নাই তাৰ লেশ;
চৰণত পৰি কৰোঁ কাতৰে কাকূতি
ৰক্ষা কৰা মোক হৃষীকেশ।
———০————
দশাৱতাৰ স্তোত্ৰ।
দশৰূপী ভগবান কৰোঁ নমস্কাৰ,
প্ৰথমতে মৎস্যৰূপে বেদৰ উদ্ধাৰ।
পিঠিত ধৰিবে লাগি ধৰণীৰ ভাৰ,
দ্বিতীয়ত ধৰিয়াছা কচ্ছপ আকাৰ।
পুনৰপি বৰাহৰ ৰূপ ধৰি তুমি,
হেলায় দন্তৰ অগ্ৰে উদ্ধাৰিলা ভূমি।
নৰসিংহৰূপ ধৰি নখে বিদাৰিলা,
হিৰণ্যকশিপু প্ৰভু হেলায় নাশিলা।
বামনৰ ৰূপ ধৰি বলিক ছলিলা,
অতিদান বেয়া তাৰ নিদৰ্শন দিলা।
