এই পৃষ্ঠাটোৰ বৈধকৰণ হৈছে
৬০
স্তুতিমালা
অমৃত সমান অমিয় বচন
তোমাৰে কৃপাৰ দান;
ব্ৰহ্মাৰ স্তুতিয়ে তেৱে কিনোমতে
মুহিব তোমাৰ মন।
পবিত্ৰ কৰিম দেহ বাক্য মন
তোমাৰ গুণকে গাই;
গুণগান বিনে মই পতিতৰ
আন গতি একো নাই।
সত্ত্ব ৰজ তম গুণৰ বিকাৰ
ব্ৰহ্মা বিষ্ণু শিৱ ৰূপ;
অব্যক্ত ভাৱত নিৰ্গুণ সততে
নিৰাকাৰ নাই ৰূপ।
ভূমি আদি কৰি পঞ্চ মহাভূত
মন বুদ্ধি অহঙ্কাৰ;
ৰূপ ৰস আদি তন্মাত্ৰ সকল
প্ৰকৃতি সৃষ্টিৰ পাৰ।
কৰ্ম্মজ্ঞান ভাগে দশ ইন্দ্ৰিয়
চৌবিশ তত্ত্বৰ সাৰ;
সুখু দুখ আদি ক্ষেত্ৰজ সকল
ইন্দ্ৰিয়-বৃত্তি বিকাৰ।
ইসব জটিল মহা মহা তত্ত্ব
বুজিবে নপাৰি আমি;