এই পৃষ্ঠাটোৰ বৈধকৰণ হৈছে
মুৰলীধৰ স্তোত্ৰ।
কৃষ্ণ কৃপাসিন্ধু অনাথৰ বন্ধু
নয়নৰ অভিৰাম;
মই পাপী অতি অগতিৰ গতি
কিমতে চৰণ পাম।
স্কন্ধে পৰি শোভে কুঞ্চিত অলক
মুখত ইষৎ হাহি;
কটাক্ষে ভুবন কৰি বিমোহন
সঘনে বজোৱা বাঁহি।
কপালত শোভে কস্তুৰি তিলক
কৌস্তুভ বক্ষত জ্বলে;
নাশিকাৰ আগে গজমুক্তা দোলে
বেনু ধৰা কৰতলে।
সৰ্ব্ব অঙ্গে শীত সুগন্ধি চন্দন
গলত মুকুতা-পান্তি;
চৌপাশে গোপিনী মাজত গোপাল
নৰজলধৰকান্তি।
অতি সুললিত বিশ্ববিমোহন
তোমাৰ বংশীৰ ধ্বনি;
তৰু লতা আদি পশু পক্ষী নৰে
শুনিছে তবধ মানি।