এই পৃষ্ঠাটোৰ বৈধকৰণ হৈছে
৪৩
স্তুতি-মালা।
বৃষ্ণিবংশে জন্ম ধৰি যদুবংশ ধ্বংস কৰি
পৃথ্বীভাৰ কৰিলা হৰণ;
নানাৰূপে অৱতৰি দুষ্টক সংহাৰ কৰি
ধৰ্ম্ম সদা কৰিছা পালন।
ধন জন পুত্ৰ জায়া সকলো তোমাৰ মায়া
মায়ামোহে পৰি যায় প্ৰাণ;
মায়ামোহ নাশ কৰি চৰণে চপাই ধৰি
কৰা হৰি মোক পৰিত্ৰাণ।
সম্পদত মজি হায় সজ জ্ঞান লোপ পায়
বিপদে আকুল কৰে প্ৰাণ;
সুখ হলে শান্তি নাই আশা ক্ৰমে বাঢ়ি যায়
সত্য কিবা নাপাওঁ সন্ধান।
তোমাৰ মোহিনী মায়া জগৎ তাৰেই ছাঁয়া
ইটো প্ৰভু দুৰাৰোগ্য ব্যাধি;
জৰামৃত্যুজন্মভোগ যতমানে ভবৰোগ
তুমি তাৰ কেৱল ঔষধি।
সহস্ৰ সহস্ৰ অতি অপৰাধ দিনেৰাতি
জানি কৰোঁ মই মূঢ় জন;
তুমি প্ৰভু কৃপাসিন্ধু অনাথ-জনৰ বন্ধু
ৰক্ষা কৰা শ্ৰীমধুসূদন।
———০———