যি মানুহে সদায় ৰাম কৃষ্ণ নাম লয়, সেই মানুহৰ মৃত্যুলৈ অলপো ভয় নাথাকে। (তেওঁলোকে সদায় নাম লোৱাৰ ফলত মায়াৰ হাত সৰাৰ কাৰণে বিষয়লৈ সিবিলাকৰ অলপো মোহ নাথাকে, গতিকে মৃত্যুভয়ে পীড়িব নোৱাৰে।)
[ ৪৬৩ ]
ৰাম কৃষ্ণ নাম সদা লৱে যিটো নৰে।
যম ৰাজা তাহাৰ লিখন দূৰ কৰে॥
যি মানুহে সদায় ভগৱানৰ ৰাম-কৃষ্ণ আদি নাম লয়, যম ৰজাই সেই লোকৰ ভাগ্যত লিখা দুখ-কষ্ট মাচি পেলায় অৰ্থাৎ সদায় ৰাম- কৃষ্ণ আদি নাম লোৱাৰ ফলত মানুহৰ পূৰ্ব্ব জন্মৰ কৰ্ম্মফলত বেয়া হবলগীয়া থাকিলেও বেয়া হব নোৱাৰে, সি ভালত পৰিণত হয়।
[ ৪৬৪]
ৰাম কৃষ্ণ নাম সদা ফুৰে যিটো গাই।
তাহাৰেসে সমস্ত বিঘিনি ভৈলা ছাই।
যি মানুহে সদায় ৰাম-কৃষ্ণ নাম গায়, সেই লোকৰ সকলো প্ৰকাৰ দৈহিক অসুখ নষ্ট হয় অৰ্থাৎ সদায় নাম লোৱাৰ ফলত মানুহৰ হবলগীয়া আপদ ঘটিব নোৱাৰে।
মহিমাযুক্ত উপদেশ
[৪৬৫ ]
ৰাম কৃষ্ণ নাম যাৰ মুখত থাকয়।
তাহাৰেসে জানিবা মিলিল মহোদয়॥
