এই পৃষ্ঠাটোৰ বৈধকৰণ হৈছে
১২৭
সটীক নামঘোষা
[ ১৩৯ ]
নজানোহো আৱাহন নজানোহো বিসৰ্জ্জন
পূজা মন্ত্ৰ নজানো কিঞ্চিত।
এতেকে পৰমেশ্বৰ দাস ভৈলো চৰণৰ
মোৰ গতি সাধিবে উচিত॥
তোমাক কেনেকৈ মাতিব লাগে মই নাজানোঁ; পূজাৰ অন্তত কিৰূপে তোমাক বিদায় দিব লাগে তাকো নাজানোঁ; পূজা কিৰূপে কৰিব লাগে আৰু সেই পূজাৰ মন্ত্ৰ বা কি অলপো নাজানোঁ। সেই কাৰণে ( উপায় নাপাই ) হে সকলোৰে অধিপতি ভগৱান, মই তোমাৰ দাস হলোঁ। মোৰ উচিত গতি সাধিবা অৰ্থাৎ মই তোমাৰ একান্ত দাস হোৱাৰ ফলত মই যিহৰে উপযুক্ত হওঁ তাকে মোক দিবা।
[ মই একো নাজানোঁ, কেৱল একান্ত মনে ভগৱানৰ আশ্ৰয় লৈছোঁ; তাৰ ফলত যি হয় হওক—একো কামনা নকৰোঁ। ]
নামান্বয়
কৃষি ভূৰ্বাচকঃ শব্দো ণশ্চ নিবৃত্তিবাচকঃ।
দ্বয়োৰ্বাক্যাৎ পৰব্ৰহ্ম কৃষ্ণ ইত্যভিধীয়তে॥
(১৪০-১৪২)
