এই পৃষ্ঠাটোৰ বৈধকৰণ হৈছে
এটা সহজ কথা
অভ্যাসবশতঃ চাই অহা ফালেই
তুমি চালা
পৰিস্থিতিৰ তাগিদাত
মইহে আছিলোঁ ইফালে
তুমি নেদেখিলা মোক
মই দেখিলোঁ তোমাক
ইয়াকো দেখিলোঁ
যে তুমি মোলৈ চাইছিলা
মই দেখিলোঁ তোমাৰ হেঁপাহ
আমি নেদেখিলোঁ
পৰস্পৰে পৰস্পৰক
অনুভৱ কৰিলোঁ তোমাৰ নিশাহ
অনুভৱ কৰিলোঁ তোমাৰ হুমুনিয়াহ
তুমি অকলশৰীয়া হ’লা
অকলশৰীয়া হ'ল তোমাৰ চিন্তা
তোমাৰ চেতনা
অকলশৰীয়া হ'লোঁ ময়ো
বহু ক্ষেত্ৰত
মানুহ নিঃসংগতাৰ সংগী হৈ পৰে
অনন্ত সময়ৰ বাবে
এনে একোটা সহজ কথাতে ।।
শব্দশিল্পৰ আখৰা/৬৩
