এই পৃষ্ঠাটোৰ বৈধকৰণ হৈছে
যুদ্ধভূমিৰ কবিতা
যুদ্ধৰ পক্ষত এতিয়া আমি কোনোৱেই নাই
উদ্যত মাৰণাস্ত্ৰৰে সজ্জিত উগ্ৰপন্থীয়েও কয়
তেওঁলোকেও হেনো যুদ্ধ নিবিচাৰে ইচ্ছাকৃতভাৱে
অথচ আমি সকলোৱেই এতিয়া
যুদ্ধই কৰি আছোঁ পূৰ্ণগতিৰে
অবিৰাম, অহৰ্নিশে
নীতি বুলিবলে’ এতিয়া কোনো কথা নাই
আচলতে এতিয়া আমি কোনোৱেই নহয়
কোনো নীতিত বিশ্বাসী
তথাপি আমি নাম দিছোঁ
ৰাজনীতি, সমাজনীতি, ধৰ্মনীতি, অৰ্থনীতি ইত্যাদি
নীতিৰ ঢাল লৈ সকলোৱেই মাথোঁ কৰি আছোঁ
দুৰ্নীতি - কেৱল দুৰ্নীতি
আমি আৰু কিমানবাৰ চলনা কৰিম নিজকে
আমি আৰু কিমানবাৰ আত্মগোপন কৰিম
নিজৰ ভিতৰতে
একো নজনাকৈয়ে আমি আৰু কিমানবাৰ
অভিনয় কৰিম সকলো জনাৰ দৰে
নিজম দুহাতেৰে প্ৰাৰ্থনা কৰিছোঁ হে সময়
তুমি উপহাৰ দিব নোৱাৰানে
এনে এখন সমাজ
যুদ্ধ য’ত নতজানু হয়
য’ত দুৰ্নীতিৰ সলনি মাথোঁ নীতিয়ে বাট লয়॥
শব্দশিল্পৰ আখৰা / ৫৪
