এই পৃষ্ঠাটোৰ বৈধকৰণ হৈছে
মধুমেহ
শুনিছোঁ তই হেনো নীৰৱ ঘাতক
কথাটোত মই তিলমানো গুৰুত্ব দিয়া নাই
মই জানো
মৃত্যু চিৰন্তন
মৃত্যু শাশ্বত
মৃত্যু অনিবার্য
আজিৰ দিনত কোননো নহয় নীৰৱ ঘাতক
শাসক, বিৰোধী, উগ্ৰপন্থী, মুক্তিকামী
গৃহস্থ কিম্বা আলহী
ঘাতক বাহিনীৰ ফাঁকে ফাঁকে আমাৰ আহ-যাহ
প্ৰৱঞ্চকৰ দপদপনিত প্ৰদূষিত উশাহ
ধন্যবাদ অ’ মধুমেহ
তোক শত সহস্র ধন্যবাদ
মৃত্যুৰ ভাবুকিৰে তয়েইতো মোক শিকালি
সুস্থ জীৱন-যাপনৰ বুনিয়াদী পাঠ
ভাবুকিৰ ভণ্ডামিৰে তয়েই মোক দেখুৱালি
মৃত্যু জিনাৰ সেন্দূৰীয়া বাট ৷৷
শব্দশিল্পৰ আখৰা / ২১
